Shotgun
البيضه ولاّ الفرخه؟
النهارده قلعت النظارة الشمس بتاعتي اللى بـ500 جـم و بصيت على بلدي. لقيت كارتونة البيض ب15 جنيه... يعني البيضه بـ نص جنيه. كأن البيض فيه فوسفور مثلا... ولاّ العيش اللى غلي و احنا داخلين على موسم مدارس و سندوتشات. ولاّ أزمة الميّه اللى عندنا و احنا بلد نهر النيل... طب أفهم... ازاي عندنا محافظات مش لاقين يشربوا و احنا عندنا النيل العظيم و السد العالي اللى زلّنا بيه؟ ولاّ ظاهرة انتحار الشباب الخرّيجين اللى مش لاقين لها حل... ازاي الواحد أهلوا يصرفوا عليه طول عمرهم عشان يتخرج ميلقيش شغل... متوقّعين انّه ينيّل ايــه؟ الولد بتصعب عليه نفسه... بتصعب عليه أحلامه اللى تلاشت مع انعدام الوساطة و ضيق المحال... بيصعب عليه أبوه اللى تعب و صرف و عمل و باع أرضه عشان يدخّل ابنه تعليم "عالي".... لأ عالي فعلا.. الواد بتاع سياسة و اقتصاد اللى طلع التاني عالدفعة و مخدوهوش معيد... راح امتحن امتحان الخارجية و نجح و لمّا تحرّوا عنّه لقوه من أسرة بسيطه فاترفض... دخل أوضته و شنق نفسه.. ازااااي وصلنا للحال ده؟! طب قبلتوه ليه يا محترمين يا بتوع التنسيق لو مفيش تناغم في المبادئ بينكم و بين الجهات العليا؟ ليه تعشّموا البني آدم و بعدين ترموه هو و شهادته في الزبالة؟ بيقولوا طب ما يتعلم حرفة... أجيب الواد اللى عنده 22 سنه و أقول له روح يبني اتعلملك صنعه؟! انت أهبل ولا بتستهبل؟ طب ما المتفوق حيشوف مصر عملتله ايه... أو بالأصح عملت فيه ايه و يقوم سايب البلد و على قورته طز كبيرة.. بيع مصر يا معلّم... مش هي دي مصر اللى بشوفها بالليل و الناس نايمه... مصر جميله قوي و الظلم نايم... و بالتالي نتج جيل الـ"مثقّفون من المجتمع" اللى كل واحد شايف نفسه فاهم أكتر من البقر اللى حواليه و شايف ان الحياة الغربية بأفكارها و تقاليدها هي المأوى و الملاذ... و شويه شويه اندثر الدين... و بقى "المتديّن" واد ممل و ملوش في البتنجان... و اللى بيشجّع الفساد و المخدرات و الدعارة هو الشبّ الجامد اللى الناس بتتهبل عليه... و اللى يقول لك مليش في الدخان ولاّ الرقص ولاّ الصحوبيّة يبقى واد هفأ... ولاّ الواد اللى اتّصل بمنى الشاذلي على الـ10 مساء.. عنده 40 سنه.. و لا عايز يتجوز و لا عايز شقة… الواد خلاص صرف نظر.. و فالآخر يزعلوا ان التحرش موجود!! متجيش تجوّع الكلب و تزعل انه قام نط عليك.. ده كل اللى الولد عايزه انه يلاقي ياكل… فين الـwelfare؟ بتروح فين فلوس الضرايب و الجمارك و البترول و الدهب و الدمغات و التبرعات و المنح الدولية و القروض؟ فييين يا أخي؟؟؟؟؟ قول لي أنا اتخنقت!!! دول البهايم في المزارع بيجيبولها ونيس من الجنس الآخر… و الراجل مش لاقي ياكل أصلا عشان يتجوز؟؟!! اعتبره بهيمه... اما تأكّلوه يامّا تضربوه بالنار عشان مبيعرفش يبيض البيضه أمّ نص جنيه. ولاّ المدن الجديده... تيجي انت تبني مدن فخمة و متطرفة بعيد عن الشعب الغلبان و ترمي الغلبان… دي حتى uptown cairo اللى في المقطم عملولها سور عشان ميشوفوش الزبالة... مقدرش أسمّي المدن دي الاّ مقابر جماعية. بيجهّزوا الفريسة للمفترس. ألبس النظارة تاني؟ قبل ما يلبّسوهالي بالغصب... اقلع النظار السودة يا مصري و اتفرج على بلدك... قبل ما بكرة يكسّروهالك. مصر بتتغيّر قوي لمّا الشمس بتطلع... Labels: Egypt
Dear RR...
(sigh) مصر جميله قوي و الظلم نايم...
If I could put my anger & greif over Egypt aside I would write a post about this - though one is not enough & in fact, everytime I ever tried, I just feel like crying...
Ya khosara ya Masr...
Brilliantly Written.
Posted by
Jade |
9/03/2007 10:23:00 AM